有機會參加這擺痟媽祖的活動，實在是誠予人歡喜，舊年tú-tú入來台語系tio̍h聽學長、學姊講參加民俗活動ê經驗，感覺誠特別閤趣味，本來以為愛等到二年ê時陣才有機會參加，想bē到這ê願望遐爾緊就會使實現！
咱tī第三工坐遊覽車到雲林土庫才開始行，感謝媽祖保庇，我第一擺隨香tio̍h抵著好天，bē講真熱嘛無落雨，佮同學那行那開講，實在是真心適。雲林到嘉義一路上所抵著ê人、所看著ê光景，無論是庄腳ê景色抑是抱囝仔出來鬥鬧熱ê阿公、阿媽，實在予我為著台灣人佮媽祖信仰ê連結所感動。阮祖厝ê邊仔嘛有一間媽祖廟，是阮兜佮歸庄ê信仰中心，猶會記得gín仔時阿媽總是牽著在廟埕騎腳踏車ê我入去廟內底拜拜，kah媽祖拜託保庇咱歸家人ê平安大趁錢、予我gâu讀冊；雖然講我的阿媽tī我高中三年ê時陣tio̍h過往ah，無機會佮阿媽講這擺特殊ê經驗，m̄閣為著鑽轎腳趴tī塗跤hō͘神轎經過ê彼當陣，我相信心中彼款使人平靜ê感受，阿媽一定嘛了解。
看著除了我，原來台灣閤有遐爾濟gín仔親像我仝款，毋是干焦阿公、阿媽ê疼痛，甚至閣有媽祖婆ê保庇佮台灣人才有ê特別ê感情tī-leh內底。咱幾何個人已經開始期待明年，按算beh行完全程。
雲林佮嘉義交界的崙子橋頂。
我的部落格蒐藏