@PURE

 　　我叫做顏均羽，民國八十年十月四號出生tī台北市內湖區，m̄閣阮的父母lóng m̄是在地人，in lóng是自少年的時陣tio̍h出外phah拚趁錢，tī結婚以後才儉有夠錢tī台北買厝，hō͘我佮阿兄會使tī khah 好的環境大漢。

　　自細漢阮的父母tio̍h 誠注重我佮阿兄的教育，除了生活的環境，阮的父母擱買了真濟優良讀物予我佮阿兄，譬如講漢聲出版精選的尪仔冊，內面有世界真濟所在的作家想像力的表現，親像萬花鏡共款，hō͘我個世界lóng變作七彩的，彌補我tī gín仔時因為父母空課沒閒tshōa我四界去tshit-thô的 ûi-hām；擱有共款是漢聲所出版的「中國童話故事」， 自thè-phù開始聽，一工一個故事，聽久，連冊頂的國字嘛 ē曉認l，年節的由來佮風俗習慣、古早的傳說、歷史上真正發生過的代誌，三百六十个故事，每一个lóng誠趣味，會記得細漢個時陣，欲睡進前，我lóng ē家己  the̍h錄音機khǹg tī 枕頭腳，na聽na 睏落眠。

　　讀國小三年个時陣，為著鄉土課程一个叫做「文化小芽子」的活動，佮先生猶有共組个幾何個个同窗作伙去做調查，親身去學校附近誠有名个「碧山巖開漳聖王廟」參觀，除了為著家己會使了解生活teh這个漳州人為主个地區，這个廟所代表个意義，嘛擱愛家己製作幻燈片，teh中晝時去所有三年个教室巡迴講古。這擺經驗嘛hō͘我心內對這片土地个文化个興趣，親像一粒種子「pho」一聲發芽，漸漸 tī我的心頭生根，最後，甚至影響著高中決定志願个方向……。